सपनाको पछि लाग्दा नर्कको यात्रा: ४० लाख खर्चेर अमेरिका पुगेका एक नेपालीको कहालीलाग्दो भोगाइ

नेपालमा उज्ज्वल भविष्य नदेखेर र अस्ट्रेलिया जाने प्रयास असफल भएपछि अवैध बाटो हुँदै अमेरिका प्रस्थान गरेका एक नेपाली युवकको साढे पाँच वर्ष लामो यात्रा निकै कष्टकर बनेको छ। नेपालमा बी.बी.ए. अध्ययन गर्दागर्दै दलालको प्रलोभनमा परी अमेरिका हिँडेका २८ वर्षीय ती युवकले आफ्नो यात्राका क्रममा मृत्यु, हिंसा र मानव क्रूरतालाई नजिकबाट भोगेका छन्।

नेपालमा रोजगारी र भविष्यको विकल्प नदेखेपछि ती युवकले दलालमार्फत अमेरिका जाने निधो गरेका थिए। दलालले “९० प्रतिशत यात्रा सुरक्षित रहने” आश्वासन दिएपछि परिवारले बस्ने घर-जग्गा नै बन्धकी राखेर ४० लाख रुपैयाँ जुटाएको थियो। तर, काठमाडौँ छोड्दा उनले यो यात्रा यति महँगो र कष्टकर हुने कल्पनासम्म गरेका थिएनन्।

साढे दुई महिनाको जोखिमपूर्ण यात्राका क्रममा उनी ब्राजिल, पेरु, इक्वेडर र कोलम्बिया हुँदै पानामाको कुख्यात जङ्गल ‘डारिएन ग्याप’ प्रवेश गरे। दलालहरूले चार दिनको बाटो भनेर झुक्याए पनि उनलाई सो जङ्गल पार गर्न ९ दिन लागेको थियो।

यात्राका क्रममा उनले बाटोमा बेवारिसे अवस्थामा रहेका तीनवटा शवहरू प्रत्यक्ष देखे। सोही क्रममा उनको आँखा अगाडि एउटा हाइटीको परिवार विखण्डन भयो। जङ्गलको कठिन यात्राका क्रममा ७० वर्षीय वृद्ध बुबाको मृत्यु भयो भने त्यसको तीन दिनमै उनका ३५ वर्षीय छोराले पनि ज्यान गुमाए। पछाडि बाँकी रहेकी गर्भवती बुहारी र सानी नातिनीको क्रन्दनले जङ्गलको वातावरणलाई अझ भयावह बनाएको उनी स्मरण गर्छन्।

युवकका अनुसार यात्राका क्रममा स्थानीय माफिया र एजेन्टहरूको क्रूरता चरमोत्कर्षमा थियो। बाटोमा एक १४ वर्षीया किशोरी र उनकी आमामाथि सा*मूहिक ब*ला*त्कार भएको र सो घटनाको प्रतिकार गर्न खोज्दा बुबाको हातका तीनवटा औँला खुकुरीले काटिदिएको घटनाले तस्करहरूको क्रूरता झल्काउँछ।

यस्तै अर्को हृदयविदारक घटना होन्डुरसमा घटेको थियो। एक नेपाली युवक मोटरसाइकल दुर्घटनामा गम्भीर घाइते भएका थिए। तर, प्रहरीको फन्दामा परिने डरले एजेन्टहरूले उनलाई तीव्र गतिमा गुडिरहेको गाडीबाट सडकमा फालिदिए। उता नेपालमा भने ती युवकको मृत्यु भइसकेको खबर लुकाएर दलालले परिवारसँग किस्ता-किस्तामा पैसा असुलिरहेको पाइएको थियो।

अनेकौँ हन्डर र कष्ट सहेर अमेरिकाको भूमिमा पाइला टेक्ने बित्तिकै उनले राहत महसुस गर्न पाएनन्। सीमा सुरक्षा बलले उनलाई पक्राउ गरी हतकडी लगायो। उनलाई १८ दिनसम्म एउटा शौचालय जत्रो सानो र अँध्यारो कोठामा अन्य ६ जनासँग कोचिएर राखियो। सो अवधिमा १७ दिनसम्म उनले घाम देख्न, नुहाउन वा दाँत माझ्न समेत पाएनन्।

हाल अमेरिका पुगेको साढे पाँच वर्ष भइसकेको छ। कडा परिश्रम गरेर उनले घरको ४० लाख रुपैयाँ ऋण त चुक्ता गरे, तर उनको कानुनी हैसियत अझै निश्चित हुन सकेको छैन। उनी अझै पनि ग्रिन कार्ड पाउने वा नेपाल डिपोर्ट (फिर्ता) हुने दोसाँधमा बाँचिरहेका छन्।

आफ्नो विगत सम्झँदै ती युवक भावुक हुन्छन्। उनी भन्छन्, “सामाजिक सञ्जालमा देखिने चमकधमक देखाउने दाँत मात्र हुन्, चपाउने दाँत अर्कै हुन्छ। अवैध बाटोबाट यात्रा गर्दा बाँचिन्छ कि बाँचिन्न भन्ने निश्चित हुँदैन। त्यसैले कसैको देखासिकीमा लागेर यो आ*त्म*घाती बाटो कहिल्यै नरोज्नुहोला।”